Ausflüge 2020

Der Velousflug hei mir wäg Corona nid grad ganz wöue lah gheie. Mir hei entschiede e eitägegi Tour ir Region z’mache u zum Abschluss dä Tag by Gerbers uf der Bäregg lah us z’klinge. Ds Datum hei mir uf e 12. September 2020 feschtgleit.

Am nüüni chöi mir im Bärau starte,

Bir Ilfischäsi tuet de der Räschte warte.

De geits zügig der Waudhüsere zue,

Dä Ufstieg git üs scho z’chiiche gnue!

Der Wirt seit by ihm sig itz uf jede Fau,

Die schönschti Ussicht vom ganze Ämmitau!

Mir gniesse das mit Kaffi u Nussgipfu

U nähr geit’s über d’Höger ar Tausagi zue!

Dert isch de scho üses Zmittag parat.

Es git di obligate Spaghetti mit Salat!

Nach ere Riiseportion hätte mir eigentlich gnue,

Aus Überraschig git’s aber no e Glace derzue!

Über Lützuflüeh geit’s de der Bänzebärg uf,

Das nimmt üs itz no einisch der Schnuuf!

Übere Haut ir Bäsebeitz sy du aui froh,

Mir hei ändlich, ändlich es Bierli übercho!

Die Einte finge nähr daheime ds Dusche tou.

Die Angere gniesse es „SCHNÄUS“ im Hirsche Langnou!

Uf der Bäregg verwöhne üs de Chrigu u d’Brigitte,

Dä Abschluss isch eifach no e MEGA HIT!!

Brigitte, Chrigu u Ädu mir danke viu Mau!!