ausflug 2014


28./29.06.2014 velotour wallis

bericht

11 männerriegeler hei bereits am morge am siebni ihri velos verlade u sy über bern -freibourg gäge "col des mosses" zuegfahre.  in "chateu d oex" isch üs e chäsi ufgfaue, wo sie der chäs stehend glageret hei. das sig äbe itz sprinz, dä wärdi stehend glageret, het hofer ürsu gwüsst. är wet, ar hätt hie u da o so es sprinzli, het du eine trochen füre brösmelet. die wo sy mitcho wüsse, vo wäm das dä spruch isch.

churz nach em znünihaut hei mir in "la lecherettes" d velo gsattlet u sy am "lac d hongrins" nach uf e pass "les agites" gfahre. uf der 10 km länge abfahrt nach yvorne hei mir wie kamikatzefahrer die 1000 höhemeter mit glüeige brämse gmeischteret. der bus het zwar am tunnugwöub churz aghäicht, aber süsch isch die fahrt riibigslos gange. wyter isch es der rhone nach uf "st. maurice" gange, wo mir üs bym mittagshaut wie gäng mit spaghetti gschterkt hei.

churz vor em neustart, het blaser ürsu no hurti e nagu y vorderpneu gschteckt u du am bäsewage churz druf nach saillon gfunket: "i ha leider e panne u wär froh, we dir mi würdet cho abhole". Das hei mir du o gmacht u es het in saillon nächhär du niemmer meh fiduz gha, no mit de velo wyter zfahre.

so hei mir haut verlade u sy mit de auto am hotäu olympica zuegfahre. nach em znacht hei mir in brig no ds nachtläbe gnosse, aber scho chly nah de eufe sy au im bett gsy.

wius am sunntig der ganz tag gredi ache gschiffet het, hei sich es paar nach em zmorge no es wellness gleischtet. nach em mittag sy du aui zfriden u gmüetlich hei zu tuckeret.

fazit vo däm usflug: wätter samschtig gut u sunntig nass. stimmig usgezeichnet. zfriden u gmüetlich zrugg.

fotos